2005-tii ayaa magaalada qadiimiga ah ee Nazareth waxaa laga furay hoteelkan xilli ay jireen warar la isla dhexmaraayo iyo eedo.
Hoteelka oo laga sameeyay guri 200 sanadood jira oo ay Carab leedahay ayaa waxaa yaal 60 sariirood, waxaana maamula laba qof oo aan la filayn inay midoobaan: haweeney Carab ah iyo nin Yuhuud Israa’iili ah.
Hasayeeshee kuma aanay midoobin xumaanta unee, Fauzi Azar Inn ayaa waxa uu furay goob ay isaga tageen dadkii deganaan jiray.
Halkaas oo ay ku badnaayeen dukaamo la xiray, guryo faaruq ah iyo dad maandooriyayaasha ka shaqeeya.
“Markii ugu horraysay ee aan maqlay in hoteelkan la furay, waxaan is iri waaw waa meel wanaagsan… taasi caadi ma ahayn,” ayuu Alon Gelbman, oo ah parfasoor maareynta dalxiiska ka dhiga Koleejka Kinneret ee Galilee. “Hasayeeshee si degdeg ah ayey ku noqotay sheeko guul.”
“Markii ay ayeeyadeed dhimatay, qoysku markaa kaddib maba aysan tagin meesha,” ayuu yiri Suraida Shomar Nasser, kaas oo ay hoteelka wada sameysteen Maoz Inon.
Markii aan dib ugu soo laabannay deegaanka, oo aannu aragnay sida hoteellada ay xarun ugu noqonayaan bulshada, Maoz ayaa waxa uu go’aansaday inuu furto hoteel uu leeyahay. Mar uu booqday Nazareth – magaalada ugu weyn ee Carabta Israa’iil, oo Muslimiinteedana ay yihiin 70% dadka halkaas ku nool ee gaaraya 77,000 – ayaa waxa uu la kulmay Fauzi Azar.
“Albaabkaas yar ayaan ka soo galay waanan yaabay,” sidaas ayuu Maoz xasuustaa. “Saadaal wanaagsan ayaa markiiba ii muuqanaysay”.
Waxa uu u tagay Suraida, oo markii hore fikirkaas aad uga cabsanaysay. “Waxaan moodayay inuu wareersan yahay,” ayey tiri. “Waxaan ku iri Maoz arrintaas iska ilow, oo qoys kale raadso. Waxa uu I waydiiyay sababta markaasaan ku iri “sababtu waa inaad Yuhuud tahay, marka kulama shaqeyn karo.”
Ra’yi kala duwanaanshiyuhu waa uu sii fogaaday. Suraida awoowgeed, kaas oo hoteelkaasi magaca u bixiyay, waxa uu ka soo qeybqaatay dagaalkii Carabta iyo Israa’iil ee 1948-kii. Hasayeeshee Maoz waa uu ku adkaystay dalabkiisii, ugu dambayntiina waxa uu Suraida hooyadeed ku qanciyay ra’yigiisii, hooyadaas oo fursadda aragtay.
“Waa ay ogeyd in aanay wax lacag ah iga helayn,” Maoz ayaa yiri, “hasayeeshee waxay ila tahay inay wax un igu aragtay.”
Dadka deegaanka ayaa shirkadda ay sameysteen ninkaasi Yuhuudka ah iyo inantaas Carabta ah waxa ay ka muujinayeen shaki, waxa ayna Suraida iyo qoyskeeda ku eedeeyeen inay howl kale la “maleegayaan” Maoz si uu “u Yuhuudeeyo” magaalada, ku taal waqooyiga Israa’iil.
“Howl fudud ma aanay ahayn,” ayey tiri. “Hasayeeshee waxaannu go’aansannay inay caadi tahay oo aynu iskuday sameyno.”
Kaddib dayactir ballaaran hoteelkii ayaa dadweynihii loo furay, dalxiisayaashuna waxa ay bilaabeen inay yimaadaan.
“Waqti adag ayaa ina soo maray,” Maoz ayaa sidaasi sheegay. “Balse haatan waxaannu aragnaa in ay isbadeshay dhammaan magaaladaas qadiimiga ah waxaana jira dukaamo iyo goobo lagu qaxweeyo iyo hoteello la furay sababtoo ah innagaa meesha joogna. Howl adag ayaan qabtay oo waxaan la kulmay qofkasta oo bulshada ka mid ah, marka waa ay ogaayeen inaan halkan u joogo saaxiibtinimo iyo inaan dadka caawiyo.”
Walow Maoz uusan haatan ku noolayn magaalada Nazareth haddana waxa uu yaqaan inta badan magacyada dadka dukaamada ku leh, waxaanna lagu amaanaa inuu gacan ka gaystay dhayidda xiisadaha halkaas ka taagan iyo inuu magaalada geeyo dalxiisayaasha Yuhuudda ah.
