Agaasimaha Guud Ee Xannaanada Xoolaha Oo Ka Hadlay Qorshe Dib Loogu Xoolaynayo Dadka Gobollada Galbeedka Ee Abaarta Ku Caydhoobay

Agaasimaha Guud Ee Xannaanada Xoolaha Oo Ka Hadlay Qorshe Dib Loogu Xoolaynayo Dadka Gobollada Galbeedka Ee Abaarta Ku Caydhoobay
Agaasimaha Guud ee Wasaaradda Xannaanada Xoolaha Somaliland, Cabdi Axmed Nuur (Cabdi Guray),ayaa sheegay in ay wadaan qorshe dib loogu xoolaynayo dadka gobollada galbeedka ee abaarta ku caydhoobay oo uu sheegay in ay la kaashanayaan dadka gobollada kale ee xoolo dhaqatada ah ee aanay abaartu duunyada ka qaadin.

Waxaa kale oo uu ka hadlay dawayn iyo xog ogaal u noqoshada xoolaha gobollada barriga dalka oo ay socdaal ku soo mareen wefti uu ku jiro oo ka socday Wasaaradda Xannaanada Xoolaha oo uu hoggaaminayay Wasiirul dawlaha Wasaaradda Xannaanada Xoolaha Cabdirashiid Riyo Raac oo soo maray gobollada Togdheer,Saraar,Sanaag iyo Sool.

Agaasimaha Guud ee Wasaaradda Xannaanada Xooluhu waxa uu sidaas ku sheegay waraysi uu xalay QorilugudNews ku siiyay Xarunta Wargeyska oo uu booqday.

“Waxaanu ahayn Wefti Wasaaradeed oo uu hogaaminayo Wasiirul dawlaha xannaanada Xoolaha, anigoo ah agaasimaha guud,agaasimaha waaxda shaqaalaha, iyo hawl wadeenno kale waxaanu socdaalkayagu ku salaysnaa in aanu wax ka ogaano xaaladda guud ee Xoolaha ee gobolladaa dhinacyada saamaynta Abaaraha, Biyaha, Caafimaadkooda, iyo guud ahaanba halka ay xaaladoodu marayso xilligan, waxaana gobolka Togdheer oo aanu ugu horeynay naga raacay koox ka tirsan shaqaalaha wasaaradda ee gobolkaa Togdheer oo dhakhaatiir xoolaha ah iyo daawooyin gurmadka deg degga ah siday oo gaadhsiinayay Xoolaha deegaanada gobolka ee aanu maraynay ,waxaanan soo marnay Gobolka Togdheer. Harada gubataxil, Dhoqoshay, Balli-dhiig,Taallobuur, Ballicalanle,illaa Qorilugud, Qabri-huluul iyo tuullooyin la xidhiidha,”ayuu yidhi Agaasimuhu, waxaanu intaas ku kabay “Waxaanu u kuur-gelayney xaaladda xoolaha iyo caafimaadkoodkooda ,xaaladda biyahooda, waxaana dhankooda daawayn naga garab waday dhakhaatiirtayada,annagoo la kulmaynay dadka xoolo dhaqatada ah qiimayna ku samaynaynay cabashadooda,waxaanan deegaankaa ugu badnaa xanuunada aanu ku soo aragnay Huluunbaha,Sambabka iyo Xanuuno kale oo sida ay noo sheegeen xoola dhaqatadu uu ka mid yahay Shubanka ay xooluhu leeyihiin xilligan.”

Agaasime Cabdi Guray oo hadalkiisa sii wata ayaa intaa ku daray ”Deegaankaa aanu soo maray wuxuu ahaa mid ay dayrtii hore si aad ah uga da’day isla markaana sababtay in la isugu soo guuro si aad ahna la isugu cidhiidhyay sida daaqa iyo degsiimadaba , isagoo xilligana marayey gabaabsi gaar ahaan daaqu,xoolahaas isugu guuray ee meelaha kala duwan ka yimidna cuduro ayay is qaadsiiyeen xanuunadaa aan hore u soo sheegay ayaana ugu daran. waxaa kale oo aanu u sii gudubnay deegaanka Saraar, degmadiisa Ceegaag iyo Sool oo aanu ka gaadhnay degmooyinka Yagoori iyo Yayle, dhammaantoodna waxaanu ku soo samaynay daraasad, run ahaantiina iyagoo is dhaama waxaa ugu liita gobolka Togdheer oo maanta maraya xaalad abaareed oo aan ka jirin gobollada kale ee barriga Somaliland sababtoo ah waxaa ku dhacay culays weyn oo waa la isugu wada tegay.”

Agaasime Cabdi Guray oo ka hadlayay socdaalka ay ku soo mareen gobollada Bariga Somaliland markii ay gaadheen gobolka Saraar iyo deegaamada ay tageen, waxa uu yidhi. “Socdaalkayagii degmada Ceegaag waxa xusid mudan in gobolka Saraar ay naga raaceen Guddoomiyaha gobolkaas oo aan hore weli u tegin degmada Ceegaaag, safarkayaga ka horow, isagoo ay weheliyaan isuduwayaal gobolkaa Saraar ah sida isuduwaha Xannaanada Xoolaha, Dhakhtarka Caafimaad iyo xubno kale , waxaan odhan karaa isku mid ayay ka ahaayeen dhinaca daaqa cidhiidhigiisa iyo soo guurtada, waxaanan jecelahay inaan hoosta ka calaamadiyo in Saraar ay xooluhu weli ladan yihiin, marka la eego Ceel afwayn, Caynabo iyo nawaaxigoodaa inkastoo ay cabsi badani ka jirtay.”

“Annaga socdaalkayagu gurmad deg deg ah ayuu ahaa daawooyin ayaanu sidnay, laakiin wixii aanu soo aragnay iyo baahiyaha aanu sidano ka wasaarad ahaan ayaanu uga hawl-galaynaa, markaanu kalan ku yeelanno Wasaaradda ee aanu warbixintana gudbino, waxaanan diri doonaa kooxo dhakhatiir ah oo ka hawl-gala oo illaa heer gobol iyo heer degmo oo ka jawaaba wixii aanu indhahayaga ku soo aragnay,”ayuu yidhi Cabdi Guray.

Agaasimaha Guud oo ka jawaabayay su’aal aanu ka waydiinay in ay jiraan tiro koob rasmi ah oo ay ka sameyeen guud ahaan xoolaha Somaliland ee k u baxay abaarta dalka ku dhufatay,waxa uu yidhi “Wali waa deg deg oo ma jiro tiro-koob guud oo aanu samaynay laakiin waxaa jirta qiyaas guud oo laga samayn karo imisa qoys ayay abaartu xoolo tirtay. laakiin tiro-koob sugan waanu ka soo saari doonaa. waxaa kale oo jirta qorshe aanu wadno oo aanu doonayno in lagu xooleeyo dadka gobollada galbeedka ee ku caydhoobay abaaraha ee ay xoolihiii ka baxeen,waxaanan deegaamada Barriga dalka ee aanu maraynay oo iyaga aanay abaartu xoolo ka layn aanu ku guubaabinay in marka roobku si wacan u da’o ee naqa xooluhu ay daaqaan ee ay soo doogaan in ay xooleeyaan walaalahooda caydhoobay ee galbeedka dalka oo ay Sako,kaalo iyo deeq waxay helaanba ugu deeqaan qoysaska ku tabaalloobay abaarta ee xoolihii ay ka baxeen is ay noloshoodii u soo kabato.”