Diyaarad ay leedahay xukuumadda Suuriya ayaa lagu soo warramaya in la soo riday markii uu dagaal ka dhacay deegannada ay mucaaradka ku xooggan yihiin ee dhaca gobolka Idlib.
ilo wareedyo taabacsan mucaaradka waxay sheegeen in diyaaradda lagu soo riday meel u dhaw magaalada Khan Sheikhoun.
Warar horraan soo baxayay, waxay sheegayaan in ciidammada Suuriya oo taageero ka helayo Ruushka ay gaareen meel u dhaw goobta uu dagaalka ka dhacay.
Ku dhawaad 30 dagaalyahan ayaa ku dhintay dagaalka shalay ka dhacay halkaas.
Kooxda dusha kala socoto xaaladda xuquuqda aadanaha Suuriya ee uu fadhigeedu yahay UK ayaa ku warrantay in duuliyihii saarnaa diyaaradda ay gacanta ku hayaan kooxda Taxriir Al Shaam ee ku xooggan gobolka Idlib.
Dowladda Suuriya waxay bilooyinkii ugu dambeeyay wadday dagaal kooxaha fallagada looga saarayo gobolka Idlib, waxaana taageeraya diyaaradaha dagaalka ee Ruushka.
Boqolaal qof ayaa lagu dilay gobolka halka boqolaal kun ay ka qaxeen guryahoodii.
