Saddex askari ayaa ka qeyb qaatay weerar ku idlaaday in toogasho lagu dilo haweeney lagu magacaabi jiray Breonna Taylor, oo markaas ku sugneyd gurigeeda oo ku yaalla gobolka Kentucky.
Hal askari oo kaliya ayaa loo maxkamadeeyaya arrintaas, laakiin dacwaddiisa lama xidhiidhin geerida haweeneydaas.
Brett Hankison wuxuu wajahayaa saddex dacwadood oo ku saabsan “inuu khatar galiyay dad” maadaama uu rasaas ku furay guri ku xigay kan ay dagganeyd haweeneyda, sidaasna uu halis ku galiyay dadka dariska la ahaa Ms Taylor.
Labada askari ee howlgalkaas kala qeyb galay laguma soo oogin wax dacwad ah – iyadoo xitaa mid ka mid ah uu riday rasaastii sababtay dhimashada – sababta loo maxkamadeyn waayayna waa in marka hore xabadda uu billaabay nin saaxiib la ahaa Ms Taylor, kaasoo markii dambe sheegay in dadka soo weeraray uu u maleynayay tuugo.
Go’aanka askartaas loogu dacweyn waayay dhacdadaas wuxuu sababay cadho ka timid dhinaca shacabka, waxaana mudaharaadyo ka dhacay waddooyinka magaalada Louisville iyo meelo isugu soo baxay boqollaal qof.
Hase yeeshee, ma aha markii ugu horreysay ee fal toogasho oo ay booliska geysteen uu warbaahinta qabsaday balse uu gaadhi waayay maxkamadaha. Kuwa dacwadaha lagu soo oogay aad bay u yar yihiin marka loo eego kuwa aan laga daba tagin.
Sanadkan 2020-ka gudihiisa, ilaa hadda 10 askari ayaa dacwado lagu soo oogay, sida uu sheegay Dr Phil Stinson, oo Barfasoor ka ah jaamacadda Green State ee ku taalla gobolka Ohio, horayna uga tirsanaa booliska. Wuxuu aruurinayaa dacwadaha lagu soo oogay booliska tan iyo sanadkii 2005-tii.
Sanadkii askarta ugu badan la maxkamadeeyay wuxuu ahaa 2015-kii, markaasoo 18 ka mid ah ay wajaheen dacwado ku saabsan dilal.
Wargeyska Washignton Post wuxuu toogashada sanad kasta ay boolisku dadka ugu geystaan Mareykanka ku qiyaasay 1,000.
Maxay tahay sababta askar aad u yar loogu maxkamadeeyo falalka toogashada ah ee ka dhaca Mareykanka?
Maxaase adkeeyay in la dacweeyo booliska?
Waxaa jira arrimo dhowr ah oo sharraxaad ka bixinaya sababta.
Sharciga muujinaya in adeegsiga awoodda uu lahaado sabab
Inkastoo sharciga lagu xakameeyo booliska Mareykanka ay ku kala duwan yihiin gobollada, haddana qodobka ugu badan ee ay isla wadaagaan waa in isticmaalka awoodda xad dhaafka ag “ay lahaato ujeeddo iyo sabab”.
Taa micnaheedu waa in askariga toogashada geysanaya uu aamino in xilligaas uu dareemay in dhibaato la gaarsiin rabo.
Dood badan ayaa ka taagan sida booliska fursad loogu siiyay inay erayga “sababeyn” u isticmaalaan, taasoo sidii la doono loo dhigi karo.
Askari kasta way ku filan tahay inuu afka ka sheego inuu khatar dareemay ka hor inta uusan toogashada geysanin, xitaa haddii xaqiiqda dhabta ah ay ka duwan tahay sidaas.
“Kiisaska noocan ah, sida ay taariikhda soo ahaan jirtayba, boolisku waxay soo diyaarsanayeen hadal ay ku sababeeyaan falalkooda,” ayuu yidhi Dr Stinson.
“Sababaha lasoo qoro waxay inta badan ka duwanaadaan caddeymaha laga helo muuqaallada”.
Gobolka California ayaa bishii August baddalay sharciga lagu xakameeyo booliska, wuxuuna meesha ka saaray erayga “sababeyn”, kaasoo lagu baddalay “lagama maarmaan”.
Waxaa lagu tilmaamay inuu yahay mid ka mid ah sharciyada ugu adag ee hadda ka jira Mareykanka.
